Mazkur tadbir “IHHT ning O‘zbekistondagi davlat boshqaruvi sharhi” loyihasining ikkinchi bosqichi salohiyatni oshirish doirasida o‘tkazilgan to‘rtinchi seminar bo‘lib, unda mamlakatning asosiy davlat idoralari vakillari ishtirok etdi.
15-aprel kuni Qonunchilik va huquqiy siyosat institutida Strategik rivojlanish va islohotlar agentligi Iqtisodiy hamkorlik va taraqqiyot tashkiloti (IHHT) bilan hamkorlikda hamda Germaniya xalqaro hamkorlik jamiyati (GIZ) ko‘magida strategik rejalashtirish va natijadorlikni boshqarish sohasida salohiyatni oshirishga bag‘ishlangan seminar o‘tkazdi.
Seminar davlat boshqaruvi tizimini takomillashtirish bo‘yicha tavsiyalarni amalga oshirish doirasida tashkil etildi. Muhokamalar uchun asos sifatida O‘zbekiston Respublikasi Prezidentining 2025-yil 30-oktabrdagi PF-201-sonli “Strategik rejalashtirish va rivojlanish tizimini joriy etish bo‘yicha tashkiliy chora-tadbirlar to‘g‘risida”gi Farmoni xizmat qildi.
Seminarda Strategik rivojlanish va islohotlar agentligi direktorining birinchi o‘rinbosari Abdulla Abduqodirov ma’ruza bilan ishtirok etdi. U o‘z nutqida Prezident topshirig‘iga muvofiq mamlakatda normativ-huquqiy bazani shakllantirishning birinchi bosqichi yakunlanganini va tizimni faol joriy etish bosqichiga o‘tilganini ta’kidladi. Shu bilan birga, hozirgi bosqichda mazkur tizimning har bir vazirlik, har bir qabul qilinayotgan qaror darajasida to‘liq ishlashini ta’minlash muhim ekanini qayd etdi. Strategik rejalashtirish hujjatlarining mazmuni va ahamiyati, ijtimoiy kelishuvning ajralmas qismi sifatida, ularning xalq kutgan islohotlarga qanchalik mos kelishi bilan baholanadi.
Seminarda quyidagi asosiy yo‘nalishlar muhokama qilindi:
- milliy strategiyalardan tortib vazirlik va idoralar ko‘rsatkichlarigacha bo‘lgan yagona va o‘zaro bog‘langan strategik rejalashtirish tizimini shakllantirish;
- natijadorlikni boshqarish mexanizmlarini institutsionallashtirish hamda ularning siyosiy ustuvorliklar o‘zgarishidan qat’i nazar barqarorligini ta’minlash;
- O‘zbekistondagi amaldagi strategik rejalashtirish tizimini ilg‘or xalqaro tajriba asosida tahlil qilish;
- boshqaruv qarorlarini qabul qilishni qo‘llab-quvvatlaydigan sifatli va o‘lchab bo‘ladigan natijadorlik ko‘rsatkichlarini ishlab chiqish.
Shuningdek, Buyuk Britaniya va Latviya tajribasi muhokama qilindi, ushbu davlatlarda strategik rejalashtirish islohotlari davlat boshqaruvi samaradorligini oshirishda muhim rol o‘ynagan. IHHT ekspertlari natijadorlik bo‘yicha muloqotni yo‘lga qo‘yish mexanizmlari, o‘lchab bo‘ladigan ko‘rsatkichlarni ishlab chiqish yondashuvlari hamda siyosiy o‘zgarishlar sharoitida institutsional xotirani saqlash strategiyalarini taqdim etdilar.
Seminar yakunlari bo‘yicha strategik rejalashtirish arxitekturasini mustahkamlash, natijadorlik ko‘rsatkichlarini takomillashtirish hamda Agentlik va tarmoq vazirliklari o‘rtasida barqaror muvofiqlashtirish mexanizmlarini shakllantirish bo‘yicha aniq chora-tadbirlar belgilandi. Olingan natijalar strategik rejalashtirish to‘g‘risidagi Farmonni amalga oshirishni qo‘llab-quvvatlash va milliy rivojlanish ustuvor yo‘nalishlariga erishishni monitoring qilish bo‘yicha keyingi ishlar uchun asos bo‘lib xizmat qiladi.
