Joriy yilning 4-sentabr kuni Dehqonobod tumani hokimligida hududning ijtimoiy-iqtisodiy rivojlanish holatini chuqur tahlil qilish, mavjud salohiyat va muammolarni aniqlash hamda istiqboldagi strategik vazifalarni belgilashga bag‘ishlangan yig‘ilish bo‘lib o‘tdi.

Unda tuman hokimi Sherzod Shokirov, O‘zbekiston Respublikasi Prezidenti huzuridagi Strategik rivojlanish va islohotlar agentligi sho‘ba mudiri Ikrom Fozilov, Qashqadaryo viloyati hokimligi Islohotlar shtabi guruh rahbari Oybek Qurbonov, tuman hokimi o‘rinbosarlari, viloyat hokimligi Axborot-tahlil guruhi vakillari, tuman hokimligi bo‘limlari rahbarlari hamda mahallalardagi holatni o‘rganishga biriktirilgan mas’ul xodimlar ishtirok etdi.

Yig‘ilishda ta’kidlanganidek, hududlarni strategik rivojlantirishda mavjud imkoniyat va resurslarni chuqur tahlil qilish, ichki salohiyatdan samarali foydalanish hamda kelgusidagi rivojlanish yo‘nalishlarini ilmiy asosda belgilash bugungi kunning muhim vazifalaridan biridir.

Shu nuqtayi nazardan, Dehqonobod tumanini rivojlantirishda ham an’anaviy yondashuvlar bilan cheklanib qolmasdan, ilm-fan yutuqlari, innovatsion yechimlar va zamonaviy strategik tahlil usullaridan foydalanish muhimligi qayd etildi.

Mazkur jarayonni tizimli va samarali tashkil etish maqsadida tuman hokimligida mas’ul rahbarlardan iborat maxsus shtab shakllantirildi. Tumandagi 51 ta mahallaning har birida mavjud holatni chuqur o‘rganish, muammo va imkoniyatlarni aniqlash hamda rivojlanishning istiqbolli yo‘nalishlarini belgilash uchun alohida ishchi guruhlar tuzilib, amaliy o‘rganishlar boshlandi.

Tahlil jarayonlari xalqaro amaliyotda keng qo‘llaniladigan SWOT strategik tahlil metodologiyasi asosida olib borilmoqda.

🔹 Kuchli va zaif tomonlar — tuman va mahallalarning mavjud iqtisodiy, ijtimoiy va infratuzilmaviy salohiyati, shuningdek, rivojlanishga to‘sqinlik qilayotgan omillar tizimli tahlil qilinadi.

🔹 Imkoniyatlar va xavf-xatarlar — tashqi iqtisodiy tendensiyalar, investitsiyaviy jozibadorlik, foydalanilmagan ichki imkoniyat va zaxiralar hamda kelgusida yuzaga kelishi mumkin bo‘lgan xatarlar baholanadi.

Bu yondashuv, avvalo, “muammo bor — uni hal qilish kerak” degan tor doiradagi qarashdan ko‘ra, mavjud muammoning sabablarini aniqlash, hududning ichki imkoniyatlarini ishga solish va kelajakdagi o‘sish nuqtalarini oldindan belgilash imkonini beradi.

O‘rganishlar yakunlari asosida Dehqonobod tumanining o‘ziga xos tabiiy, iqtisodiy va ijtimoiy salohiyatidan kelib chiqib, uzoq muddatli rivojlanish strategiyasi va zamonaviy innovatsion yechimlarni o‘z ichiga olgan aniq chora-tadbirlar dasturi ishlab chiqilishi ko‘zda tutilmoqda.

Mazkur strategik yondashuv hududning bugungi holatini xolis baholash barobarida, Dehqonobodning mavjud imkoniyatlarini to‘liq ishga solish, yangi o‘sish nuqtalarini shakllantirish va aholi farovonligini yanada oshirishga xizmat qiladi.